The Night Diary : ಒಂದು ಗೆರೆಯಿಂದ ಜನ ವೈರಿಗಳಾಗಬಲ್ಲರೇ?

The Night Diary : ಸ್ವಾತಂತ್ರ್ಯ ಕಾಲದ ಕಥೆ

 " All that suffering, all that death, for nothing. I will never understand, as long as I live, how a country could change overnight from a line drawn."

 

ದೇಶ ವಿಭಜನೆಯ ಸಮಯದಲ್ಲಿ ಚೂರು ಚೂರಾದ ಜನರ ಜೀವನದ ಕಥೆ ಇದು. ನಿಶಾ ಎಂಬ ೧೨ ವರ್ಷದ , ಈಗಿನ ಪಾಕಿಸ್ತಾನದ ಮಿರ್ ಪುರ್ ಖಾಸ್ ನಗರದಲ್ಲಿ ವಾಸಿಸುತ್ತಿದ್ದ   ಕಾಲ್ಪನಿಕ ಹುಡುಗಿಯ ಕಥೆಯಿದು. ಹೆಚ್ಚು ಮಾತನಾಡದ ನಿಶಾ ತನ್ನ ಪ್ರೀತಿಯ  ಅಡುಗೆ ಮಾಡುವವ ಕಾಜ಼ಿ ಕೊಟ್ಟ ಪುಸ್ತಕದಲ್ಲಿ ಹಳೆಯ ಭಾರತದಿಂದ ಹೊಸ ಭಾರತದವರೆಗಿನ ಕಥೆಗಳನ್ನು ಬಿಚ್ಚಿಡುತ್ತಾ ಬರುತ್ತಾಳೆ.

ತಾನು ಮತ್ತು ತನ್ನ ಅವಳಿ ತಮ್ಮ ಅಮಿಲ್ ಹುಟ್ಟುವಾಗಲೆ ತೀರಿಹೋದ ಮುಸ್ಲಿಂ ತಾಯಿ ಮತ್ತು  ವೈದ್ಯನಾದ ಹಿಂದು ತಂದೆ ಮತ್ತು ಅಜ್ಜಿ ಇರುವ ಪುಟ್ಟ ಕುಟುಂಬದ  ಪಾಕಿಸ್ತಾನದಿಂದ ಭಾರತಕ್ಕೆ  ವಲಸೆ ಬರುವ ಕಥೆ ಇದು.

ಮನೆ ಬಿಟ್ಟು ಜೊಧ್ ಪುರಕ್ಕೆ ಹೋಗುವಾಗ ಅಡುಗೆ ಮಾಡುವ ಕಾಜ಼ಿಯನ್ನು ಏಕೆ ಬಿಟ್ಟು ಹೋಗಬೇಕು ಎಂಬ ಅವಳಿಗಳ ಪ್ರಶ್ನೆ, ಮಾರ್ಗ ಮಧ್ಯದಲ್ಲಿ ಅಮ್ಮನ ಸಹೋದರನ  ಮನೆಯಲ್ಲಿ ಅಡಗುತಾಣವಾಗಿ ಉಳಿದುಕೊಂಡಾಗ ಎದುರಿನ ಮನೆಯ ಹಫ಼ಾ ಎಂಬ ಮುಸ್ಲಿಮ್ ಹುಡುಗಿಯ ಜೊತೆಗೆ  ಮಾತಾಡುವ ಆಸೆ, ರಾಜಸ್ತಾನದ ಮರುಭೂಮಿಯಲ್ಲಿ ನೀರಿಗಾಗಿ ನಡೆಯುವ ಕೊಲೆಗಳ ಕಥೆ ಎಲ್ಲವೂ ಒಬ್ಬ ಹುಡುಗಿಯ ದೃಷ್ಟಿಕೋನದಲ್ಲಿ  ಲೇಖಕಿ ನೋಡಿದ್ದಾರೆ . ಬೇರೆ ಧರ್ಮದವರು ಬೇರೆ ರೀತಿಯ ಮಾನವರೆ ? ತಾವು ಎಲ್ಲಿಗೆ ಸೇರಿದವರೆಂಬ ಗೊಂದಲಗಳನ್ನು ಇಟ್ಟುಕೊಂಡೆ ತನ್ನ ತೀರಿಕೊಂಡ ತಾಯಿಗೆ ಪತ್ರ ಬರೆಯುತ್ತಾ,  ಬಂಗಲೆಯಲ್ಲಿ   ವಾಸಿಸುತ್ತಿದ್ದವಳು ಜೋಧಪುರದಲ್ಲಿ ಒಂದು ಚಿಕ್ಕ ಕೊಣೆಯ ಮನೆಯಲ್ಲಿ ವಾಸಿಸುವ ಪರಿಸ್ಥಿತಿ ಬರುತ್ತದೆ. ಪಾಕಿಸ್ತಾನದ ತನ್ನ ಮನೆಯಲ್ಲಿ ಬಿಟ್ಟುಬಂದ ಆಟಿಕೆಗಳನ್ನು ಈಗ ಯಾರೊ ಆಡುತ್ತಿರಬಹುದು ಎಂಬ ಯೋಚನೆ, ಒಂದು ಗೆರೆಯಿಂದ ಗೆಳೆಯರಂತೆ ಇದ್ದ ಜನ ಏಕೆ ವೈರಿಗಳಾದರು? ಎಂಬ ಮುಗ್ದ ಪ್ರಶ್ನೆ, ತಾನು ಎರಡು ಕಡೆಯಲ್ಲಿ ಇರಬಹುದಲ್ಲವೆ ಎಂಬ ತರ್ಕ ಇತ್ಯಾದಿ ಭಾವನೆಗಳು ಪುಸ್ತಕವನ್ನು ನೆನಪಿನಲ್ಲಿ ಉಳಿಯುವಂತೆ ಮಾಡುತ್ತದೆ. ದುಗುಡ , ತಲ್ಲಣಗಳು ಒಂದೆಡೆಯಾದರೆ ತನ್ನ  ಪ್ರೀತಿಯ  ಕಾಜ಼ಿ  ಧರ್ಮ ಬೇರೆಯಾದರೂ , ಪಾಕಿಸ್ತಾನದಿಂದ ತಪ್ಪಿಸಿಕೊಂಡು ಜೋಧ್ ಪುರ ಕ್ಕೆ ಬಂದಾಗಿನ ಸಂಭ್ರಮ ಮುಂತಾದ ಘಟನೆಗಳು ನಾವು ಮತ್ತೆ ಬದುಕಬಲ್ಲೆವು ಎಂಬ ಭರವಸೆಯನ್ನು ನಿಶಾಳಿಗೆ ಕೊಡುತ್ತದೆ.

ನೀರಿನ ಅಭಾವದಿಂದ ತಾವಿನ್ನು ಸತ್ತೇ ಹೊಗುತ್ತೇವೆ ಎಂಬಾಗ ಮಳೆ ಬಂದು ಜೀವ ಉಳಿಸುವುದೊಂದಾದರೆ, ಅದೇ ನೀರಿಗಾಗಿ ಇಬ್ಬರ ಜಗಳವಾಗಿ ಕೊಲೆಗಳೆ ನಡೆಯುವ ಘಟನೆ ಇನ್ನೊಂದು ಬದಿಯಲ್ಲಿ ನಿಲ್ಲುತ್ತದೆ. 

ಕೊನೆಯಲ್ಲಿ ಕಾಜ಼ಿ ಮತ್ತೆ ಬಂದಾಗ ನಿಶಾ ಹೀಗೆ ಬರೆಯುತ್ತಾಳೆ :

" To Nehru, Jinnah, India, and Pakistan, to the men who fight and kill—you can’t split us. You can’t split love."

( ನೆಹರು, ಜಿನ್ನಾ,ಭಾರತ, ಪಾಕಿಸ್ತಾನ,ಯಾರು ಜನರನ್ನು ಧರ್ಮಕ್ಕಾಗಿ ಕೊಂದಿರೋ- ನೀವು ನಮ್ಮನ್ನು ಬೇರ್ಪಡಿಸಲಾಗದು.ನೀವು ಪ್ರೀತಿಯನ್ನು ಬೇರ್ಪಡಿಸಲಾಗದು!)

ನನಗೆ ತುಂಬಾ ಇಷ್ಟವಾದ ಪುಸ್ತಕಗಳಲ್ಲಿ ಈ ಪುಸ್ತಕ ಈಗ ಬಂದು ಸೇರಿದೆ. ನಿಶಾ ಮತ್ತು ಅಮಿಲ್ ತಮ್ಮ ಜೀವನವನ್ನು ಮತ್ತೆ ಸರಿಮಾಡಿಕೊಳ್ಳುತ್ತಾರೆಯೆ?ನಿಶಾ ತಾನು ಎಲ್ಲಿಗೆ ಸೇರಿದವಳೆಂಬ ಪ್ರಶ್ನೆಗೆ ಉತ್ತರ ಹುಡುಕುತ್ತಾಳೆಯೇ?

ಇದು ನಮ್ಮ ನಡುವಿನ   ಅದೆಷ್ಟೋ   ಆ್ಯನ್ ಫ಼್ರಾಂಕ್ ಗಳ ಕಥೆಯ ಕಾಲ್ಪನಿಕ ರೂಪ.