ಭೂಮಿಯೂ ಒಂದು ಜೀವಿಯೆ?

 ಮೊನ್ನೆ ಬಿಕ್ಕೆ ಗುಡ್ಡಕ್ಕೆ ಹಣ್ಣು ಹೆಕ್ಕಲು ಹೊದಾಗ ಗೌರಿ ಹೂವಿನ ಬಳ್ಳಿಯನ್ನು ಕಂಡೆ. ಅದಾಗಲೆ ಕಂಬಳಿಹುಳವೊಂದು ಎಲೆಗಳನ್ನು ತಿನ್ನುತಿತ್ತು. ಮರುದಿನ ನೋಡಿದಾಗ ಹಕ್ಕಿಯೊಂದು ಅದೇ ಕಂಬಳಿಹುಳಗಳನ್ನು ತಿನ್ನುತಿತ್ತು. ಅಂದರೆ ನಿಸರ್ಗಕ್ಕೆ ಯಾವ ಜೀವಿಗಳೂ ಅತಿಯಾಗಿ ಸಂಖ್ಯೆ ಹೆಚ್ಚಿಸಲು ಕೊಡದೆ ಸಮತೋಲನ ಕಾಪಾಡಲು ಗೊತ್ತಿದೆ ಎಂದಾಯಿತು. ಆದರೆ  ಆಗ ತಾನೆ ಗೌರಿಹೂವು ಚಿಗುರಿದ್ದು ಚಿಟ್ಟೆಗೆ ಹೇಗೆ ಗೊತ್ತಾಯಿತು? ಅಲ್ಲಿಯೆ ಕಂಬಳಿಹುಳ ಹೆಚ್ಚು ಎಲೆಗಳನ್ನು ತಿನ್ನುತ್ತಿದೆ ಎಂಬುದು ಹಕ್ಕಿಗೆ ಹೇಗೆ ಗೊತ್ತಾಯಿತು?

 ಮಳೆಗಾಲದಲ್ಲಿ    ಮಣ್ಣು ತೊಳೆದುಹೋದ ನಂತರ ಕೆಲವೇ ದಿನಗಳಲ್ಲಿ ಹೊಸ ಹುಲ್ಲು ಹುಟ್ಟುತ್ತದೆ. ಹಾಗೆಯೇ ಹೊಸ ಮಣ್ಣು ಹಾಕಿದಾಗಲೂ ಸಹ ಬಚ್ಚಲುಬಳ್ಳಿಯಂತಹ ಬಳ್ಳಿಗಳು ನಾವು ಊಹಿಸಲೂ ಸಾಧ್ಯವಿಲ್ಲದ ವೇಗದಲ್ಲಿ  ಬೆಳೆಯುತ್ತವೆ. ಹಕ್ಕಿಗಳು ತಿಂದು ಬಿಸುಟಿದ ಬೀಜಗಳು ಮೊಳಕೆಯೊಡೆದು ಹೊರಬರುತ್ತವೆ. 

     ಹಾಗಾದರೆ ಭೂಮಿಗೆ ಯಾರು ಹೇಳಿಕೊಟ್ಟಿದ್ದು  ಮಣ್ಣು ತೊಳೆದು ಹೋಗಲಾಗದಂತೆ ಗಿಡ ಹುಟ್ಟಬೇಕೆಂದು? ಯಾರು ಹೇಳಿಕೊಟ್ಟಿದ್ದು ಹಕ್ಕಿಗಳು ಬೀಜ ಪ್ರಸಾರ ಮಾಡಬೇಕೆನ್ನುವುದ್ನನು? ಗದ್ದೆ ಕಟಾವಿನ ಕೆಲವೇ ದಿನಗಳ ನಂತರ ಕೀಟಹಾರಿ ಡ್ರಾಸಿರ ಗಿಡ ಹೇಗೆ ಬರುತ್ತವೆ? ಅಲ್ಲಿ ಹುಟ್ಟಿದರೆ ಮಾತ್ರ ಆಹಾರ ಸಿಗುತ್ತದೆ ಎಂದು ಡ್ರಾಸಿರಾಕ್ಕೆ ಹೇಗೆ ಗೊತ್ತು ?  ಹಾಗಾದರೆ ಭೂಮಿಗೂ ಪ್ರಜ್ನೆ ಇದೆಯೆ? ಭೂಮಿಯೂ ಒಂದು ಜೀವಿಯೆ?

      ಈಗ ಜಾಗತಿಕ ವಿಷಯಗಳನ್ನು ನೋಡಿದರೆ ೨೦-೨೫ ವರ್ಷಗಳಲ್ಲಿ ಸಾಧಿಸಲಾಗದನ್ನು ಒಂದು ವೈರಸ್  ಒಂದು ತಿಂಗಳಲ್ಲಿ ಮಾಡಿದೆ. ೧೫ ವರ್ಷಗಳ ಕಾಲ ಮಾನವ ಪ್ರಯತ್ನದಿಂದ ರಿಪೇರಿ ಮಾಡಲಾಗದಿದ್ದ ಓಜ಼ೊನ್ ಪದರ ೧೫ ದಿನಗಳಲ್ಲಿ  ಸರಿಯಾಗಿಬಿಟ್ಟಿದೆ. ಕಣ್ಣಿಗೆ ಕಾಣದ ವೈರಸ್,  ನಿಸರ್ಗವನ್ನು ಕೊಳ್ಳೆ ಹೊಡೆಯುತ್ತಿದ್ದ  ಧನಿಕ ದೇಶಗಳನ್ನೇ ಸ್ತಭ್ದ ಮಾಡಿಬಿಟ್ಟಿದೆ. ಭೂಮಿ ತನ್ನ ಗಾಯವನ್ನು ಸರಿಮಾಡಿಕೊಳ್ಳುತ್ತಿದೆಯೆ? 

    ಇಂತಹ ಪ್ರಶ್ನೆಗಳ ಹಿಂದೆ ಬಿದ್ದು ಭೂಮಿಯೂ ಒಂದು ಜೀವಿ , ಅದರ ಅಂಗಾಂಗಗಳು ಈ ಭೂಮಿಯಲ್ಲಿ ವಾಸಿಸುವ ಜೀವಿಗಳು ಎನ್ನುವ ಒಂದು ತತ್ವವಿದೆ. ಅದೇ ಗಾಯಾ ಸಿದ್ಧಾಂತ. 

  

ಗಾಯಾ ಸಿದ್ಧಾಂತ ಎಂದರೇನು?:  ಈ ಸಿದ್ಧಾಂತ ಹೇಳುವುದು   ಪರಿಸರಕ್ಕೆ ಅನುಗುಣವಾಾಗಿ    

ಜೀವಿಗಳು ರೂಪುಗೊಂಡಿಲ್ಲ. ಬದಲಾಗಿ ಜೀವಿಗಳಿಗೆ ಅನುಗುಣವಾಗಿ  ಪರಿಸರ ರೂಪುಗೊಂಡಿದೆ. ಜೀವಿಗಳಿಗೆ ಹೇಗೆ ಅಂಗಾಂಗಳು ಇರುತ್ತದೆಯೋ, ಹಾಗೆಯೇ ಭೂಮಿಗೆ ಜೀವಿಗಳು ಅಂಗಾಂಗಗಳಂತೆ. ಜೀವಿಗಳ ಸಮೂಹ ಸೇರಿ ಪರಿಸರವನ್ನು ನಡೆಸುತ್ತವೆ. ಮತ್ತು ಜೀವಿಗಳಿಗೆ ಗಾಯವಾದಾಗ ಹೇಗೆ ಗುಣವಾಗುತ್ತದೆಯೋ , ಹಾಗೆಯೇ  ಭೂಮಿಯೂ ಸಹ ತನಗಾದ ಗಾಯಗಳನ್ನು ತನ್ನದೇ ರೀತಿಯಲ್ಲಿ ಸರಿಪಡಿಸಿಕೊಳ್ಳುತ್ತದೆ. ನಮ್ಮ ದೇಹದಲ್ಲಿ ಜೀವಕೋಶಗಳು ಸತ್ತ ನಂತರ ಹೊಸ ಜೀವಕೋಶಗಳು ಸೃಷ್ಟಿಯಾಗುತ್ತವೆಯಲ್ಲವೇ? ಇದನ್ನು  homeostasis  ಎಂದು ಕರೆಯುತ್ತಾರೆ. 

 

ಗಾಯಾ ಸಿದ್ಧಾಂತ ನಾಗರೀಕತೆಯ ಆರಂಭದಿಂದಲೂ ಬೆಳವಣಿಗೆಯಾಗುತ್ತಾ ಬಂದಿರುವ ಸಿದ್ಧಾಂತ.  ಒಂದು ದೃಷ್ಟಿಯಿಂದ ಪಂಚಭೂತಗಳು, ಗ್ರೀಕಿನ ಗಾಯಾ, ರೊಮಿನ ಟೆರ್ರಾ ಗಳ ಆಧುನಿಕ ವರ್ಶನ್ ಈ ಗಾಯಾ ಸಿದ್ಧಾಂತ.

 

ಗಾಯಾ ಎಂದರೆ ಯಾರು? :  ಗಾಯಾ  ಎಂಂದರೆ

 ಗ್ರೀಕ್‌ ನಾಗರೀಕತೆಯ ಒಂದು ದೇವತೆ. ನಮ್ಮ ಸಿಂಧೂ ನಾಗರಿಕತೆಯಲ್ಲಿ ಹೇಗೆ ಪಂಚ ಭೂತಗಳಿವೆಯೊ ಹಾಗೆಯೆ. ಮಾನವ ವಿಕಾಸವಾದ ಹಾಗೆಯೆ ತನ್ನ ಯೋಚನೆಗೆ ಮೀರಿದ  ನಿಸರ್ಗದ ನಿಯಮಗಳನ್ನು ಶಕ್ತಿಯಾಗಿ ನೋಡಿದ.ಈ ರೀತಿಯ ದೇವತೆಗಳ ಕಲ್ಪನೆಯನ್ನು ಸಾಮಾನ್ಯವಾಗಿ ಎಲ್ಲಾ   ನಾಗರೀಕತೆಗಳಲ್ಲೂ  ಕಾಣಬಹುದು. ಉದಾಹರಣೆಗೆ ರೊಮನ್ ನಾಗರೀಕತೆಯಲ್ಲಿ ಭೂಮಿತಾಯಿ ಎಂದು ಟೆರ್ರಾ ದೇವತೆಯನ್ನು ಸೂಚಿಸಿದರೆ, ಅಜ್ಟೆಕ್ ನಾಗರೀಕತೆಯಲ್ಲಿ ಪ್ರಕೃತಿಯನ್ನು ಶಕ್ತಿ ರೂಪದಲ್ಲಿ ಪೂಜಿಸಿದರು. ಮಾನವ ವಿಕಾಸವಾದಂತೆ ಆತನ ದೇವರ ಬಗೆಗಿನ ಕಲ್ಪನೆಗಳೂ ವಿಸ್ತಾರವಾಗುತ್ತಾ ಹೋಯಿತು. 

ಕಾಕತಾಳೀಯವೆಂಬಂತೆ ಯಾರಾದರೂ ತೀರಿಕೊಂಡ ಮೇಲೆ ಪಿಂಡ ಪ್ರದಾನ ಮಾಡಲು ಗಯಾಕ್ಕೆ ಹೋಗಬೇಕು ಎನ್ನುತಾರೆ. ಅದಕ್ಕೂ ಇದಕ್ಕೂ ಏನಾದರೂ ಸಂಬಂಧವಿದೆಯೆ ಗೊತ್ತಿಲ್ಲ!

     ೧೯೬೦ ರಲ್ಲಿ  ನಾಸಾ ಮಂಗಳ ಗ್ರಹದ ಮೇಲೆ ಜೀವ ಉಗಮವಾಗಿದೆಯೆ ಎಂದು ಪರೀಕ್ಷಿಸಲು ಬ್ರಿಟನ್ನಿನ ವಿಜ್ನಾನಿ ಜೇಮ್ಸ್ ಲವ್ಲಾಕ್( James Lovelock) ಎಂಬ ವಿಜ್ಞಾನಿಯನ್ನು ಕರೆಸಿತು. ಆತ ಒಂದು ಸುಲಭ ವಿಧಾನದಿಂದ ಮಂಗಳನಲ್ಲಿ ಜೀವ ಇಲ್ಲ ಎಂದು ತೋರಿಸಿದ. ಒಂದು ಸ್ಪೆಕ್ಟ್ರೊಮೀಟರ್ ನ ಸಹಾಯದಿಂದ ಮಂಗಳ ಗ್ರಹದ ವಾತಾವರಣದಲ್ಲಿ ಜೀವ ಉಗಮವಾಗಿಲ್ಲ ಎಂದು ಹೇಳಿದ.ಆದರೆ ನಾಸಾಕ್ಕೆ ಈ ತತ್ವ ಒಪ್ಪಿಗೆಯಾಗಲ್ಲಿಲ್ಲವಾದ್ದರಿಂದ ಆತನನ್ನು ವಾಪಸು ಕಳುಹಿಸಿತು.

    ವಾಪಸು ಬಂದ ನಂತರ ಲವ್ ಲಾಕ್ ತನ್ನ ತತ್ವದ ಮೇಲೆ ಕೆಲಸ ಮಾಡುತ್ತ ಭೂಮಿಯೂ ಒಂದು ಜೀವಿಯಂತೆ ಅಂದರೆ ಭೂಮಿಯ ಮೇಲಿನ  ಜೀವಜಾಲವು ಕೆಲಸ ಮಾಡುವಾಗ ಒಟ್ಟಾಗಿ ಒಂದು ಜೀವಿಯಂತೆ ವರ್ತಿಸುತ್ತದೆ  ಎಂಬುದನ್ನು ಗಮನಿಸಿದ. ಒಮ್ಮೆ ತನ್ನ ನೆರೆಯವ  ವಿಲ್ಲಿಯಮ್ ಗೊಲ್ಡಿಂಗ್ನ ಬಳಿ ತನ್ನ ತತ್ವದ ಬಗ್ಗೆ ಚರ್ಚೆ ಮಾಡಿದಾಗ ಆತ ಈ ಸಿದ್ಧಾಂತಕ್ಕೆ  ಗ್ರೀಕ್ ಪುರಾಣದ ದೇವತೆ ಗಾಯ ಎಂಬ ಹೆಸರು ಸೂಚಿಸಿದ. ಹೀಗೆ ಲವ್ಲಾಕ್ ನ ಸಿದ್ಧಾಂತಕ್ಕೆ ಗಾಯಾ ಸಿದ್ಧಾಂತ (gaiya Theory) ಎಂಬ ಹೆಸರು ಬಂತು. 

ಗಾಯಾ ಸಿದ್ಧಾಂತದ ಹೆಸರಿನ ರಾದ್ಧಾಂತ! :  

ಗಾಯಾ ಸಿದ್ಧಾಂತ ಗ್ರೀಕಿನ ದೇವತೆಯ ಹೆಸರಗಿದ್ದರಿಂದ ಇದು ಮೂಡನಂಬಿಕೆಯತ್ತ ಕರೆದೊಯ್ಯುವ ಸಿದ್ಧಾಂತ ಎಂದು ಮೊದಲು ಆಕ್ಷೇಪಗಳು ಬಂದವು. ಗಾಯಾ ಸಿದ್ಧಾಂತ ಮೊದಲಿಂದಲೂ ನಾಗರೀಕತೆಯ ಉಗಮದ ಕಾಲದಿಂದಲೂ ಇದ್ದ ಸಿದ್ಧಾಂತ . ಇದರಲ್ಲಿ ಹೊಸತೇನಿದೆ ಎಂಬ ಆರೋಪಗಳೂ ಹೇರಳವಾಗಿಯೇ ಬಂದವು. ಇದು ವೈಜ್ಞಾನಿಕ ನೆಲೆಗಟ್ಟಿನ ಮೇಲೆ ಹೋಗುವುದಿಲ್ಲ ಬದಲಾಗಿ ಆಧ್ಯಾತ್ಮಿಕ ನೆಲೆಗಟ್ಟಿನಲ್ಲಿ ಹೋಗುತ್ತದೆ ಎಂಬ ವಾದಗಳೂ ಇವೆ. 

ಕೊರೊನಾ ಕೂಡ ಭೂಮಿಯ ಔಷಧಿಯೇ? :  

ಈಗ ಮಹಾಮಾರಿ ಕೊರೊನಾವನ್ನೆ ತೆಗೆದುಕೊಳ್ಳುವ. 

ಇದು ಧನಿಕ ರಾಷ್ಟ್ರಗಳಿಗೆ ಹೆಚ್ಚು ಕಾಡಿದೆ. ಕೊಳ್ಳುಬಾಕತನಕ್ಕೆ ದಾರಿಯಾಗಿದ್ದ ಜಿಡಿಪಿ ದರವನ್ನು ಸೊನ್ನೆಗಿಂತ ಕೆಳಗೆ ತಂದು ಕೂರಿಸಿದೆ.ವರ್ಷಗಳಿಂದ ಸರಿ ಮಾಡಲಾಗದಿದ್ದ ಓಜ಼ೊನ್ ಪದರ ವಾರಗಳಲ್ಲಿ ರಿಪೇರಿಯಾಗಿದೆ. ಇವೆಲ್ಲವನ್ನೂ ನೋಡಿದರೆ ಭೂಮಿಯೂ ಒಂದು ಜೀವಿಯ ರೀತಿ ವರ್ತಿಸುತ್ತಿರುವಂತೆ ಭಾಸವಾಗುತ್ತದೆ. 

   

ಗಾಯಾ ಸಿದ್ಧಾಂತದ ನೆಲೆಗಟ್ಟಿನಲ್ಲಿ ನೋಡಿದರೆ ಭೂಮಿಯೂ ತನಗಾದ ಗಾಯಕ್ಕೆ ಮುಲಾಮು ಹಚ್ಚುತ್ತಿದೆಯಷ್ಟೆ. ಆದರೆ ಭೂಮಿ ಹಚ್ಚಿದ ಮುಲಾಮು ಇಷ್ಟೊಂದು ಉರಿಯುತ್ತದೆ ಎಂದು ಯಾರೂ ಊಹೆ ಮಾಡಿರಲಿಲ್ಲ! ನಮಗೆ ಭೂಮಿಯ ಔಷಧಿಯೇ ಬೇಕೇ ಅಥವ ನಾವೆ ಪರಿಹಾರ ಕಂಡುಕೊಳ್ಳೋಣವೇ? ಪರಿಹಾರವೇನೋ ಇದೆ. ಅದನ್ನು ಬಳಕೆಗೆ ತರಬೇಕು ಅಷ್ಟೇ. ಇಲ್ಲದಿದ್ದರೆ ನಮಗೆ ಭೂಮಿಯ ಮುಲಾಮೇ ಗತಿ!!

~ವನ್ಯಾ ಸಾಯಿಮನೆ

 ೯ ನೇ ತರಗತಿ